Блог

Интервјуто е најзастрашувачкиот дел од процесот на вработување, а дополнителен е стресот доколку истото не е индивидуално, туку групно. Групните интервјуа не се многу чести, но сепак не се исклучок. Па, доколку се најдете на такво интервју, добро е да ги имате следните мали совети „во ракав“ за да се истакнете помеѓу сите други. 1. Оставете значаен прв впечаток Во обично интервју, секогаш се борите да бидете подобри од сите останати талентирани кандидати. Но, во групното интервју, вашите конкуренти се физички присутни во истата просторија со вас, што може да додаде дополнителен притисок. Намалете го притисокот и стресот со тоа што ќе ја зграбите секоја можност да се издвоите од останати на некој од следните начини: Изглед: бидете претставителни и професионални благодарение на вашиот изглед. Вашата коса нека биде уредна и одберете класични комбинации на облека. Пристигнување: обидете се да стигнете на местото каде ќе се одвива интервјуто барем 10-тина минути пред договореното. Немојте да дојдете премногу рано за да не им пречите на вработените. Вашата точност ќе покаже дека не само што сте заинтересирани и подготвени за интервјуто, туку и дека имате одлични способности за управување со време – една многу важна карактеристика. Поздравување: не заборавајте дека на групно интервју ве оценуваат и за вашиот однос и прифаќање на околината. Затоа упатете им насмевка на останатите, одржувајте нормален контакт со очите и претставете се. Покажете одреден интерес за другите кандидати, бидејќи сепак, една од причините за групните интервјуа е да тестираат колку успешно вие како индивидуи можете да функционирате во тим. 2. Бидете смирени и присебни Немојте да бидете нервозни, бидете подготвени и реагирајте присебно на секакви ситуации и сѐ што може да изгледа чудно. Секако, ова е многу полесно да се каже отколку да се направи, но имајте на ум дека ве повикале на интервју, бидејќи во вас препознале некакви вредности. Затоа бидете среќни поради ова и пренесете ја позитивната енергија кон самодоверба и сигурност дека ќе бидете најдобри на групното интервју. 3. Одржувајте баланс Групните интервјуа тестираат голем број на вештини како лидерство, тимска работа, комуникација, способност за слушање, способност за управување со време, дипломатија и решавање на проблеми. Од клучно значење е да ги потенцирате вашите способности, но без да се поставувате доминантно над останатите кои се дел од истиот процес. Притисокот кој ќе го чувствувате во таа натпреварувачка средина, можеби ќе ве натера да се обидувате да ги надвладеете другите кандидати за да добиете поени, но обидете се да не го правите ова, би дејќи мора да покажете трпение и способност да функционирате во тим според правилата. Добро составете ги и средете ги вашите мисли пред да избрзате со зборување. Но, зборувајте само кога имате да понудите нешто вредно и значајно за темата која е отворена.
Ако имате големо искуство во вашата индустрија и поседувате многу вештини, добро е да ги нагласите за време на интервјуто. Но, мора да знаете дека постои разлика помеѓу „правење важни“ и докажување на вашето знаење. Следните совети ќе ви помогнат да оставите одличен впечаток, истакнувајќи ги вашите вештини на вистински начин. Споменете ги вашите вештини на интервјуто Еден од најлесните начини да се осигурате дека работодавачот е свесен за вашите вештини и искуство, е културно да ги споменете кога ќе сметате дека е потребно. На пример, ако тој ве праша кои се вашите способности, вие можете да ја искористите шансата и да зборувате конкретно и детално за вештините и не заборавајте да го вклучите и искуството кое може да се поврзе со работата во нивната компанија.   Покажете, не кажувајте Кажувањето и покажувањето се две различни работи. Наместо само да нафрлите кои се вашите вештини, покажете им со вистински зборови кои ќе го потврдат вашето кажување. Можете да напоменете колку години работите во таа индустрија, да раскажете за вашите задачи и одговорности и накратко да резимирате за успешната работа или проектите на кои сте работеле. Со тоа што ќе дадете доказ за вашите вештини и искуство, ќе го убедите работодавачот дека сте компетентни за позицијата за која аплицирате. Користете стручни („инсајдерски“) термини Во секоја индустрија, постојат посебни фрази и терминологија кои се употребуваат. Обидете се за време на интервјуто да ја вклучите таа специфична терминологија (наменета за индустријата во која е компанијата) во вашиот јазик, секојпат кога ќе сметате дека може да ви биде од корист. Ова е одлична можност да ги истакнете вашите способности и бидете сигурни дека потенцијалниот работодавач ќе биде импресиониран доколку му покажете дека навистина се разбирате во областа. Поставувајте прашања На крајот од интервјуто, задолжително е да поставите прашања. Тоа му покажува на оној кој го води разговорот дека сериозно сте заинтересирани за позицијата. Обидете се да поставите прашања со кои ќе го покажете вашето длабоко знаење и разбирање во индустријата и за компанијата, секако. Покажете дека сте заинтересирани, љубопитни и дека имате големи познавања, и бидете сигурни дека шансите за вработување ќе ви се зголемат. Бидете опуштени Интервјуата се секако стресни, но внимавајте да не бидете премногу нервози, бидејќи тоа ќе го пренесете и на оној кој ве интервјуира, а тоа не ви оди во прилог. Бидете смирени и фокусирајте се на вашето искуство што треба да го докажете и покажете сигурност и самодоверба со цврсто ракување, контакт со очи и добро држење на телото. Слушајте ги внимателно прашањата кои ви ги поставуваат, верувајте во вашата подготвеност и обезбедете си вработување!
Унапредувањето во менаџерска или лидерска позиција, може да биде многу возбудливо и предизвикувачко искуство, посебно доколку тоа е нешто кон кое сте се стремеле подолг период. Па, откако ќе заврши славењето и радувањето, време е да се спуштите на земја и да ја земете одговорноста на ваш грб. Можеби ќе се чувствувате преоптоварени и несигурни за тоа што треба да биде вашиот следен чекор, бидејќи оваа позиција е непозната територија за вас. За да може да се впуштите правилно во новата улога, фокусирајте се на следните неколку чекори, кои за почеток ќе ви помогнат да се движите во вистинска насока и да создадете вистинска гледна точка за новата позиција. Оставете го егото пред вратата На почетокот, ќе се чувствувате како да сте на врвот на светот – и со право ќе биде тоа така! Но, сега е време да излезете од улогата на докажување и да се насочите кон тоа како да се издигнете во вашата нова позиција. Можеби сте биле многу успешни како обичен вработен, но не заборавајте – како менаџер/лидер почнувате сега за првпат. Ќе ви треба време да најдете начини за да докажете дека можете да бидете успешни и во менаџерска/лидерска улога, но тоа е сосема во ред. Бидете трпеливи, љубезни, покажете понизност и прифаќајте совети од вашите колеги на иста позиција. На тој начин, ќе добиете респект од вашиот тим и ќе биде полесно да го водите. Фокусирајте се на учење Важно е да се фокусирате на раст на бизнисот и давање резултати, но не заборавајте на учењето. За да си обезбедите долгорочен успех, ќе мора да научите нешто за вашата нова бизнис средина. Ова вклучува политика и култура на компанијата за која работите, како и стратегии со кои работи истата. Секој бизнис, секој департман и секој тим е различен, па затоа земете си време да дознаете што им треба, кои се нивните улоги, предности, што ги мотивира и покажете им дека сакате да работите со нив. Начинот на работа, политиките на работа и културата како лидер, може да бидат различни од оние кога бевте само обичен вработен. Колку побрзо ги научите овие аспекти од бизнисот, толку посигурно ќе се чувствувате. Градете односи Како нов менаџер/лидер, ќе ви требаат сојузници и партнери кои ќе ве поддржуваат вас и вашата визија за департманот кој го водите. Може да ги имате најдобрите идеи на светот, но доколку немате никој кој ќе ви помогне да ги имплементирате, тие се безвредни. Важно е да одвојувате време за да ги запознавате вашите колеги кои се на исто ниво со вас, вашите вработени кои ги водите, и да успеете да ја придобиете нивната поддршка за остварување на сите идеи и визии.
Сигурно ви се случило да не аплицирате за некое работно место, само поради тоа што мислите дека не одговарате на сите барања на компанијата. Постои мала разлика помеѓу тоа да не ги поседувате сите барани квалификации и да не сте воопшто квалификувани. Треба да знаете кога може да аплицирате иако не сте најдобар избор и кога треба да кажете „Ова е одлична можност, но веројатно за некој друг“, бидејќи вие не ги исполнувате барањата. Неколку знаци кои ќе ви помогнат кога нема да бидете сигурни дали треба да аплицирате: Не сте воопшто квалификувани ако поседувате само една барана квалификација Без оглед на тоа што работодавачите разбираат дека кандидатите не може да знаат сѐ, сепак се очекува дека ќе го знаат поголемиот дел од работите кои треба да се извршуваат. Доколку немате искуство во повеќето потточки од описот и барањата, засукајте ги ракавите и стекнете го потребното искуство за позицијата. Или, доколку не сте доволно заинтересирани, продолжете со потрагата по друго работно место. Не сте доволно квалификувани ако не поседувате само една или две од потребните квалификации Слободно може да се каже дека речиси и не постојат работодавачи кои ги повикуваат на интервју само оние кандидати кои ги исполнуваат буквално сите потточки од листата на потребни вештини. Доколку ја најдете совршената работа за вас и забележите дека не поседувате некоја вештина, но сметате дека може да ја научите, тогаш нема зошто да не аплицирате. Работодавачите дури може и да бидат среќни кога ќе видат кандидати кои не поседуваат само една до две барања, па затоа слободно пробајте си ја среќата. Не сте воопшто квалификувани доколку компанијата бара некој на кој ќе може веднаш целосно да му ја препушти работата Понекогаш компаниите бараат некој кој е одлично квалификуван и има доволно искуство за да може веднаш да се фати за работа како што треба. Кога компанијата има потреба од таков вработен, разбирливо е да немаат желба, можности или време да ангажираат некој кој ќе треба прво да го обучуваат.  Доколку налетате на оглас каде ова е јасно нагласено, немојте да трошите време доколку вие не сте вистинскиот избор за тоа и продолжете понатаму. Не сте воопшто квалификувани ако компанијата бара Senior во различна област од вашата Нема ништо лошо во тоа да сакате да ја промените кариерата и индустријата во која работите. На пример, ако сакате од финансии да преминете во маркетинг, а притоа сте истражувале и разбирате што тоа значи, тогаш зошто да не? Но, треба да одите чекор по чекор. Доколку вашата моментална позиција е на менаџерско ниво во финансии и барате работа како менаџер во маркетинг, треба веднаш да знаете дека, да се биде Senior во една област, не ве прави квалификувани за истото ниво во друга област. Не сте доволно квалификувани ако единствената работа што ве спречува, сте самите вие Во секој момент од вашата кариера ќе постојат работни позиции за кои не сте доволно квалификувани сѐ уште. Но во многу случаи, обесхрабрувањето доаѓа од ништо друго, туку од самите вас – најчесто, бидејќи едноставно сте убедени дека вие не сте квалификувани за било која работа. Колку и неверојатно да ви звучи, секој е добар во нешто, а доколку не сте доволно квалификувани за тоа што вие го сакате, направете сѐ што е во ваша моќ за да го промените тоа. Бидете храбри и немојте да се плашите од одбивање!
За ефективно барање работа, потребно е многу време, внимание, трпение и многу напорна работа. Затоа пред да започнете, бидете сигурни дека сте навистина подготвени - во спротивно, тоа ќе биде само губење време. За да го забрзате процесот и да го направите помалку стресен и секако поуспешен, започнете поставувајќи си ги овие 5 прашања: 1. Дали знам што сакам? За многу луѓе, ова e преочигледно прашање и воопшто не го ни помислуваат. Но, за да го постигнете тоа што го сакате, мора прво да знаете што точно сакате. Добро размислете пред да почнете да пребарувате. Запрашајте се кој е следниот чекор кон кариерата што ја сакате. Или, доколку сѐ уште не знаете конкретно, одлучете што е тоа што со сигурност не го сакате или треба да го промените. И тоа е добар почеток. Потоа донесете јасна одлука за карактеристиките на работните позиции кои ќе ги пребарувате, како на пример: индустрија, тип на компанија и локација. 2. Дали ги имам потребните вештини за работата која ја сакам? Ако не, што можам да направам? Ова се две прашања во едно, но и двете се важни. Сега знаете што сакате и веќе барате отворени позиции. И, уште ако можете да кажете искрено дека ги поседувате бараните вештини – тогаш, честитки! Ако не е така, без грижа. Секогаш можете да бидете подобри доколку се потрудите. На пример, можете да стекнете повеќе искуство или да научите нешто ново преку онлајн курсеви, или со прифаќање на пракса и волонтирање во некоја организација, а секако, доколку имате желба и можности, секогаш можете да го завршите потребното образование. Сите овие работи ќе ви одземат време, но доколку тоа е она што навистина го сакате, зошто да не? 3. Кои се моите приоритети? Со секоја работа ќе мора да правите различни компромиси, па затоа треба да знаете за кои услови може да преговарате, а кои од нив се ваши приоритети и остануваат непроменливи. Можеби вие сакате да работите некаде каде работно време е флексибилно и постои можност за работа од дома, но доколку сите останати услови ви се исполнети, ова можеби и не е толку голем приоритет. За сите ваши желби, поставете си го прашањето: „Дали е неопходно или само идеално?“. Направете една листа со неопходни работи и друга листа со работи кои ги преферирате, но не се задолжителни. Ова би требало да ја олесни вашата потрага по добра работа за вас. 4. Дали ги барам правилните работни места? Земете ги во обѕир само огласите за позиции кои ги поминале горенаведените тестови. Многу е лесно во одреден момент од пребарувањето, да си кажете „Ќе аплицирам на сѐ што ќе најдам“, но да бидеме искрени – вие не сте вистинскиот избор за сите работни позиции и сите работни позиции не се вистинскиот избор за вас. Затоа, дајте си поголеми шанси да бидете повикани на интервју. Запрашајте се: „Дали сум доволно квалификуван/а за да аплицирам за оваа позиција? Или, само сум оптимист?“ 5. Дали пристапувам правилно? До овој чекор, веќе треба да знаете што сакате и сте се потрудиле многу за да стигнете дотука, па затоа немојте да ја правите најголемата грешка - да не дадете сѐ од себе да се покажете во најдобро светло пред потенцијалните работодавачи кога ќе ја најдете посакуваната работа. Како да знаете дали сте на добар пат? За почеток, дали вашата апликација е наменета посебно за секоја компанија во која аплицирате? Ако не ги правите вашето CV и мотивационо писмо различно според потребите за секоја компанија, тогаш вашиот пристап не е добар. Треба добро да ја истражите компанијата и културата во неа и да ги употребите тие информации во вашата апликација, за да изгледате како одличен избор за нив. Напишете зошто сакате да работите за таа компанија, или уште подобро за конкретната работна позиција, и како вашето претходно искуство ве прави квалификувани за истата. Дајте им до знаење на работодавачите дека со тоа што ќе ви го дадат работно место, вие ќе придонесете за успехот на компанијата.
Факт е дека не може да поседувате доволно вештини, бидејќи секогаш ќе има нешто ново што ќе треба да го научите. И, додека има голем број на вештини кои треба да ги имате и се поврзани со индустријата во која работите, постојат и такви кои во денешно време е добро да ги поседувате, дури и ако не сте во областа на информатичката технологија. Одберете една или повеќе од листата и обидете се да ги научите и усовршите оваа година. Уредување на фотографии Фотографиите не се само за селфиња и за Инстаграм. Тие се исто така многу важна алатка за маркетинг и секако онлајн присуството на компанијата. Затоа, добро е да имате познавање од алатки како Photoshop со кои ќе можете да ги трансформирате фотографиите кои ќе бидат наменети за блогови, веб-сајт на компанијата, онлајн маркетинг кампањи, е-маилови итн. SEO (Search Engine Optimization) Јасно е дека кога на некого му треба информација за било што, веднаш оди на Google. Можете да ѝ помогнете на вашата компанија да добие предност со тоа што ќе научите нешто повеќе за тоа како функционира SEO и како може да го подобри бизнисот на компанијата.   E-mail маркетинг Е-маил маркетингот е еден од најлесните и најефективните начини да се придобијат клиенти. Но, тоа сигурно веќе го знаете, бидејќи и вие добивате пораки во вашето е-маил сандаче од омилените модни брендови, ресторани, кино, магазини и останати веб-сајтови. CMS (Content Management System) Ова е алатка за онлајн содржини како веб-сајтови, блогови, фотографии, видеа итн. Иако во секоја компанија може да се разликуваат, откако ќе научите една, лесно ќе биде да ги сфатите и останатите CMS алатки. Web Analytics Речиси сите компании поседуваат сопствен веб-сајт, но сепак не е доволно само да сте онлајн присутни. Многу е важно да следите и да знаете колку е ефективен вашиот сајт, колку посетители има, што тие кликаат, или колку долго се задржуваат на содржините. Со сите овие информации ќе знаете што луѓето сакаат или не сакаат, и ќе знаете што треба да содржи сајтот за посетите да се зголемуваат. Social Media Marketing Секако, сите компаниите треба да бидат достапни и активни на социјалните мрежи, доколку сакаат да бидат поблиску до постоечките и потенцијалните клиенти. Затоа научете ги сите алатки и можности на социјалните медиуми, кои можат да му помогнат на бизнисот, на организиран начин да постигне добри резултати. Проект менаџмент Да ги следите внимателно сите задачи и целиот распоред кој го имате е од клучно значење во секоја работа. Но, во денешно време со сите апликации и алатки за менаџирање со проекти, многу е полесно постојано да бидете во тек со сѐ. Истражете и одберете ја онаа која најмногу ви одговара и работата ќе ви биде олеснета.
Дали имате чувство како вашата кариера да стагнира? Новата година е тука, што значи дека е време за нов почеток. Ако не сте биле доволно посветени на кариерата досега, сега е време за спротивното. Можеби причина за тоа е недостатокот на цел – нешто што ве мотивира. Без разлиак дали тоа е нова работа или нешто ново на досегашната. Следете ги овие чекори за полесно да ја пронајдете и следите вашата цел. Убедете се себеси дека сакате нова цел Нитуедна цел не е достигната без посветеност. Дали вие вистински верувате во вашите цели? Дали сте посветени? Ако не, тогаш променете ја вашата перспектива. Немојте да чекате на околностите и да се плашите да излезете од комфорната зона. Ништо не може да ви гарантира дека ќе успеете, но чуда се случуваат кога ќе кажете „да“ и ќе се впуштите во нештото. Започнете со мали чекори Дали спаѓате во една од овие групи: а) немате идеа што ќе правите понатаму со вашата кариера б) знаете што е следниот чекор, но не правите ништо околу тоа сѐ уште Во која група и да спаѓате, не е важно, бидејќи сега е време да продолжите понатам,у. Започнете полека. Малите чекори ја зголемуваат вашата самодоверба и водат кон остварување на други мали чекори. Тие може да бидат многу поефективни и да постигнете повеќе, за разлика од големите работи кои може да останат недовршени. Бавните, но стабилни одлуки, може да ве доведат до победа. Направете стратегија Најважно за да успеете е да имате план. Без план, ќе вложите многу повеќе труд од потребното, бидејќи планот ви овозможува организација и детално планирање на сите акции и чекори кои ќе ги преземете за да стигнете до посакуваната цел. Вашиот план може да биде формален и долг или едноставен и краток. Поделете ја вашата конечна цел на повеќе мали делови. Земете календар и обележете ги сите мали работи кои треба да ги направите и запишете кога планирате да ги завршите. Користете го вашиот план како водич и нешто што ќе ве охрабрува. Гледајте во вашата цел секојдневно Ако си поставите цел и потоа заборавите на истата, тогаш вашите зборови немаат никаква вредност. Гледајте во вашата цел и потсетувајте се секое утро, за денот да може да ви започне со фокус на нешто. Секојдневното потсетување на вашата цел како да е дел од вас, игра голема улога во нејзиното остварување.
Дојде и крајот на декември, а вие работевте напорно цела година. Напишавте толку многу е-маилови, поминавте часови и часови пред компјутер, во канцеларија, на терен или пак, барајќи нова работа и проекти. Ако некој заслужува конечно одмор, тоа сте вие! Но, сепак не треба целото време за одмор да го потрошите залудно. Без разлика дали сте вработени или не, искористете ги овие денови правилно и направете нешто за вашата кариера, за во новата година да бидете пофокусирани и организирани. А, ова се 20 чекори со кои ќе превземете акција: 1. Забележете ги вашите достигнувања и победи Направете листа со најдобрите 10 достигнувања од изминатата година. Потоа, овие „победи“ можат да станат придобивки со тоа што ќе ги вметнете во вашето резиме, а работодавачите обожаваат кога можат да ги видат вашите достигнувања. 2. Честитајте го успехот некому Со тоа што ги славите победите на другите, ќе го потврдите кажувањето дека сте позитивна и охрабрувачка личност – квалитети што секој работодавач ги сака! 3. Редизајнирајте ги вашите професионални материјали Нарачајте нови впечатливи бизнис картички. Или, редизајнирајте ги вашите онјалн профили. 4. Исчистете го „инбоксот“ Ова не значи само да ги избришете старите меилови, туку и да направите „unsubscribe“ од сите места од кои ви стигаат маилови што го трошат вашето време и го полнат вашето електронско сандаче. 5. Испратете картичка за благодарност Размислете на вашите колеги, менаџер, или ментори кои ви помогнале и ве инспирирале со нешто изминатава година и дајте ѝ на таа личност до знаење колку сте благодарни за тоа. Секако, тоа може да биде и преку е-маил. 6. Прочитајте и научете како да го доведете вашето CV до совршеност Прочитајте текстови каде што има совети кои ќе ве одведат поблиску до посакуваната работа. Како треба да изгледа вашето CV, кои вештини ги бараат работодавачите, и сѐ останато со што можете да го дополните CV-то. 7. Научете како да одговорите на најчесто поставуваните прашања на интервју Пребарајте ги текстовите во кои можете да најдете многу корисни информации за тоа како треба да се однесувате на интервју, кои прашања ги поставуваат работодавачите, како треба да одговорите на нив, што не треба да кажете или што да очекувате. 8. Обновете ја вашата професионална облека Обидете се кога купувате облека, тоа да биде нешто во кое ќе изгледате професионално и пристојно, а сепак ќе можете да го носите често. 9. Реорганизирајте го вашиот простор за работа Тргнете ги сите непотребни работи што зафаќаат место на вашето биро и додадете му убавина на просторот за работа. 10. Наспијте се Хроничниот замор не може никако да ви помогне, па затоа одморете се, бидејќи така ќе бидете попродуктивни. 11. Изгуглајте го вашето име и презиме Проверете што сѐ излегува поврзано со вас. Отстранете ги сите непријатни фотографии од социјалните мрежи, невкусни коментари и сѐ што може да направи да изгледате непрофесионално. 12. Одберете една или повеќе вештини кои сакате да ги подобрите или поседувате во 2017 Тоа може да биде јавно говорење, маркетинг вештини, или пак, компјутерски вештини. Запишете се на курс, посетувајте предавања или семинари, а потоа одлучете како ќе ја развивате и употребувате таа вештина. 13. Прочитајте книги за успех во кариерата Распрашајте се наоколу или проверете на интернет, одберете нешто по ваш вкус и прочитајте книги кои ќе ви помогнат да ја подобрите кариерата водејќи се по стапките на веќе успешните. 14. Зголемете го вашето LinkedIn присуство Оваа мрежа нуди многу предности, па обидете се да бидете колку што можете поактивни, пополнете го вашиот профил или ако го немате, направете го и поврзете се со што повеќе луѓе. 15. Напишете го вашиот едногодишен план Без разлика на вашиот статус, размислете и испланирајте како да ја однесете вашата кариера на повисоко ниво. Можеби тоа ќе биде унапредување, покачување на платата, промена на работното место и барање на нова работа. Како и да е, откријте што сакате и остварете го.
Најчесто, кога луѓето бараат работа, тие се посветуваат на работната позиција, какви обврски ќе имаат и останати информации за нивната работа. Но, како за вработените, така и за оние кои бараат работа, од големо значење е да знаете каков е работодавачот. Сигурно не сакате да имате некој над вас кој постојано ќе ви врши притисок, или кој нема да биде одговорен и ќе има лошо однесување. Секако, не е лесно во половина час разговор да процените дали некој е лош или добар работодавач, но следните 5 совети ќе ви помогнат да откриете за каква компанија се работи: Репутација на фирмата Денес, интернетот е главен извор на информации, а социјалните мрежи и форумите се одличен начин да дознаете за каква компанија станува збор. На форумите можете да прочитате најискрени совети од луѓето кои имаат искуство во таа компанија или аплицирале за работа. Доколку не дознаете доволно информации на интернет, можете да се распрашате кај пријатели и познаници. Во секој случај, дури и за време на интервјуто можете да побарате информации за компанијата од личноста која го води разговорот. Однесувањето на работодавачот Еден од најдобрите начини за проценка е да го набљудувате однесувањето на личноста што разговара со вас. За време на интервјуто за работа, фокусот треба да биде на вас, за да може работотдавачот да процени дали вие сте добар кандидат. Доколку за успехот и постигнувањата на компанијата, тој зборува во прво лице еднина, тоа би значело дека тој не го почитува трудот на останатите вработени во компанијата, па веројатно и вашите заслуги нема да бидат признаени. Но, ако зборува за успесите како постигнување на сите вработени, тогаш пред вас имате одличен работодавач. Какви односи владеат во компанијата? Интерпероналните односи во компанијата се важен фактор. Кога ќе дојдете на разговор, обратете внимание на односот кој го имаат вработените меѓусебе – дали владее пријателска атмосфера или пак, има напната и негативна енергија. Обидете се да забележите дали шефот ги поздравува своите вработени и каков е неговиот однос кога разговара со нив. Иако е многу тешко да забележите сѐ, бидејќи ќе бидете фокусирани само на вашето интервју, обидете се да ги впиете сите информации што ќе ги слушнете. Како се однесува вашиот работодавач со вас за време на разговорот? Дали тој доцнеше на интервјуто и ако е така, дали добивте извинување? Дали постојано гледа во часовникот како едвај да чека да заврши интервјуто или пак во телефонот додека вие зборувате? Доколку ги прави сите овие работи, најверојатно е незаинтересиран и несериозен, а големи се шансите дека таков и ќе остане. Опис и цели на вашето работно место Секое работно место има свој опис, а често се случува работата да бара повеќе обврски од тоа што е договорено на почетокот – што е сосема нормално. Меѓутоа некогаш се случува и работадавачот да ви даде еден опис за работата, а од идните колеги, потоа да дознаете нешто сосема друго. Тоа може подоцна да доведе до ситуации каде нема да знаете што треба да правите, бидејќи вашите задачи не се јасни. Затоа, барајте од работадавачот да ви даде што подетален опис за вашите обврски и цели кои мора да ги остварите.
Добар практикант може да биде од огромна помош за вашиот професионален живот, бидејќи ќе имате време да се посветите на поголеми работи кои чекаат на вас да завршите со сите останати обврски. Од друга страна, ќе имате можност да бидете ментор и да ги развивате вашите лидерски и менаџерски способности. Но, може да се случи практикантот и да не е толку добар како што сте замислувале, а тоа може да донесе повеќе негативни од позитивни работи. Тоа може да се случи поради тоа што повеќето практиканти немаат некое големо искуство, па затоа пред да склучите договор со некој, треба добро да изберете. Секако, за тоа најмногу ќе ви помогне интервјуто, преку кое ќе дознаете какви вештини поседува кандидатот, дали ѝ одговара на вашата компанија и други работи кои сакате да ги знаете. Дали имаат вештини и способности? Кажете ми нешто повеќе за вашите волонтерски и практични искуства Волонтерските искуства може да бидат неверојатно вредни за развојот на професионални вештини. Не мора кандидатот да имал претходно искуство каде работел за пари, бидејќи понекогаш е доволно да волонтирал некаде каде што се стекнал со многу организациски, лидерски и други способности кои можеби ќе ви бидат од корист. Затоа побарајте од кандидатите да ви раскажат за тоа што научиле и кои се нивните искуства, за да можете полесно да одлучите како тие можат да придонесат за вашата работа. Какви вештини сакате да стекнете од ова искуство и што можете да ни понудите на нас? Во некои случаи, најдобро е да го поставите прашањето директно. Има кандидати кои поседуваат одлични вештини кои не се поврзани со никакво претходно искуство, а има и такви кои сакаат да научат нешто во одредена област, а вашата пракса ќе им го овозможи тоа. Во секој случај, барајте кандидати кои размислувале и знаат што  ќе искористат од таа можност што им ја нудите и што ќе придонесат за вашата компанија. Дали се заинтересирани за вашата компанија? Зошто сакате практична настава овде? Повеќето студенти само сакаат да најдат пракса затоа што мораат да ја имаат и ќе ја земат каде и да е. Но, има и такви кандидати кои ќе дадат сѐ од себе и ќе работат напорно, бидејќи се возбудени што ќе имаат можност да учат за вашата индустрија и ќе аплицираат затоа што ја почитуваат вашата компанија и работата која ја имате. Барајте луѓе кои навистина сакаат да му се приклучат на вашиот тим. Што знаете за нашата компанија? Како и на секое интервју за работа, така и на ова, ќе сакате кандидатот да покаже дека направил истражување за вас. Поставете неколку прашања, чии одговори ќе ви откријат дали кандидатот ја завршил својата домашна задача. На пример, прашајте за кој оддел е најмногу заинтересиран и дали знае со што се занимавате. Дали тие ќе се вклопат и ќе одговараaт на потребите на вашата компанија? Кои се вашите очекувања? Ова прашање може да ви помогне да дознаете дали кандидатот ја разбира работата на вашата компанија. Важно е и двете страни да дадат до знаење кои се нивните очекувања за работата, работното време и ако е платено, која е висината на надоместокот. Кои се вашите планови и цели по дипломирањето? Дознајте ги долгорочните планови на кандидатот за да видите за какви личности се работи. Тие не мора целосно да се вклопуваат во улогата и индустријата, но важно е да бидат барем на некој начин поврзани, за праксата да биде подобро искуство за двете страни, особено доколку постои можност практикантот да стане вработен.