Блог

За многу луѓе, работењето од дома, звучи како работа од соништата. Кога работите од дома, не мора да бидете официјални, можете да носите што сакате и да си ја дизајнирате сами вашата канцеларија или работно катче. Но, сепак, оваа работна околина не е идеална за секого. Проверете дали ги поседувате карактеристиките потребни за работа од дома и дали сте способни за таков тип на работа. Мотивираност Кога работите од дома, ќе мора да се потпрете само на себеси и самите да се мотивирате. Навистина може да биде тешко да се држите до задачите, без некој постојано да ве проверува или без да имате колеги со кои можеби се натпреварувате или ве мотивираат за побрза работа. Но, доколку по природа сте личност која сама се мотивира и има претприемнички дух, најверојатно нема да имате проблем со работата од дома. Доколку мотивацијата не ви доаѓа природно сама од себе, научете како да бидете попродуктивни дома . Независност Има луѓе кои преферираат да работат без постојано надгледување или интеракции со колегите. Но, тоа не значи и дека се подобри кога се оставени сами на себе. Ако забележите дека често се случува нешто во канцеларијата да ви го одвлекува вниманието и ве прави помалку продуктивни, тогаш работењето од дома ќе создаде идеална независна работна околина за вас. Доколку пак, соработката и фидбекот ви носат поголем успех, тогаш ќе мора да закажувате видео повици или повремени состаноци во живо, за да ја добивате потребната интеракција и да споделувате идеи. Комуникација Само поради тоа што работите од дома, не мора да значи дека не треба да комуницирате со други луѓе. Ќе мора да најдете алтернативни начини за успешно комуницирање со колеги, клиенти или менаџери. Решавање на проблеми Кога работите со други, решавањето на тешки проблеми може да биде лесно, бидејќи сите заедно работите на истото. Од дома, вие ќе бидете одговорни за решавање на мали и големи проблеми. Ако сте по природа снаодливи и досетливи, сигурно ќе знаете да пребарувате и да размислувате на начин на кој ќе доаѓате до разумни решенија. Донесување одлуки Кога работите независно, најголем дел од донесувањето одлуки е на ваш грб и ќе мора да си верувате сами на себе. Ако сте добри во пресудување, тогаш донесувањето одлуки ќе биде лесно за вас, но претходно осигурајте се дека заклучокот кој сте го донеле е најефективен. Без разлика дали веќе сте одлучиле да работите од дома или сте во дилема дали да преминете кон тоа, треба да ги разберете предизвиците со кои ќе се соочите во новата работна околина – дома. Откако ќе дознаете дали вашиот карактер и вашите лични особини одговараат за работа од дома, може да ги направите сите потребни промени и приспособувања.
Едно нешто што треба засекогаш да го запамтите е тоа дека е навистина лошо да отидете на интервју и да молчите, но исто толку лошо може да биде и ако зборувате премногу. Или, ако зборувате непотребни работи... Доколку оној кој го води итнервјуто го изгуби интересот, најверојатно вие ќе ја изгубите и потенцијалната работа. 5 начини на кои правите да звучите досадно и како да го поправите тоа: 1. Користите клише фрази На пример, соговорникот ве прашува коои се вашите слабости, а вие одговарате: „Перфекционист сум“. Ништо не може повеќе да ги натера оние кои го водат интервјуто да „превртуваат со очи“ од оваа досадна фраза каде кажувате дека слабост ви е нешто што всушност е добро. Па, како може да дадете подобар одговор? Најдобро е да дадете оригинален и искрен одговор, но да избегнете именување на слабости, како вештини кои се клучни за работата. 2. Вашите одговори се извежбани Клише одговорите не се единствениот проблем. Многу често кандидатите кажуваат некои стандардни одговори или повторуваат нешто што го запамтиле. Искусни интервјуирачи ќе ги натераат кандидатите да ги мислат нивните одговори за да ги запознаат подобро. Повторувањето на информациите кои се појавуваат и во вашето CV, ве прави предвлидливи и секако, звучите досадно. Затоа на секое прашање размислувајте што ќе одговорите и давајте оригинални одговори, а не да се држите постојано до она што сте го извежбале. Оние кои го водат интервјуто бараат контекст, а вие сега знаејќи го ова, понудете им продлабочување и продолжение на она што го има во вашето CV, но потрудете се тоа да биде нешто јасно и интересно. 3. Кажувате премногу информации На прашањето „Кажете ми нешто повеќе за себе“, повеќето луѓе кажуваат повеќе од потребното. Размислувајте од гледна точка на оној кој го води интервјуто. Дали би сакале да знаат сѐ што сте направиле некогаш во животот? Секако дека не. Тоа што тие го бараат е неколку клучни точки кои ќе бидат релевантни за работата која ви ја нудат, за кои подоцна ќе се разговара во детали. Најдобро е да му го олесните животот на соговорникот и да кажете: „Ќе ви кажам накратко, а потоа вие прашајте ме за сѐ што сакате да знаете подетално“. Па започнете со 3 клучни точки: „Прво ќе ви кажам за академското образование, потоа за мојата кариера досега, и на крај малку за мојата работа настрана (или доколку ја немате, можете да зборувате за тоа што очекувате и сакате да го постигнете во иднина)“. За секоја од овие 3 точки одвојте по 1 минута. 4. Не им давате смисла на вашите одговори Вие ја знаете позадината на сите ваши одговори и приказни, но соговорникот не знае ништо од тоа. Јасна изјава со контекст и смисла, не само што ќе го забрза процесот, туку и ќе покаже зошто вашиот одговор е навистина добар. На пример, добивате прашање: „Може ли да ми кажете нешто за тоа кога сте постигнале со тимот одлични резултати во предизвикувачки ситуации?“. Немојте веднаш да се истрчувате со: „Јас бев еднаш тим лидер и морав да го соберам цел тим заедно и да одржам состанок, што беше многу предизвикувачко затоа што работеа во различни канцеларии низ повеќе места...“ Наместо тоа, започнете со приказна: „Беше 2008-ма година и бевме во голема финансиска криза со компанијата. Многу вработени беа отпуштени и сите беа загрижени за својата работа...“ и продолжете со решението. Кога ќе започнете со јасен контекст, во кој накратко ја објаснувате ситуацијата, проблемот и решението, соговорникот многу подобро може да го сфати сценариото и да го заинтересира приказната. 5. Не кажувате што вие може да направите за компанијата Оној кој го води интервјуто сака да го импресионирате со вашата брилијантност, но исто така сака и да дознае што вие можете да направите за него и неговата компанија. Вашите одговори треба да покажат дека вие имате искуство и ги имате оние вештини кои им се потребни за нивната работа. Со тоа што претходно ќе имате истражено за работата или за нивните проекти, обидете се за време на разговорот да напоменете како би се справиле со проблемите на компанијата или со некој дел од проект на кој моментално работат.
Повеќето барачи на работа знаат колку е фрустрирачки да бидете повикани на второ интервју, за на крајот да бидете поразени од друг кандидат. Некогаш некој друг кандидат ќе има искуство кое повеќе одговара на потребите на компанија од вашето, но доколку често се случува да не стигате до втората фаза од интервјуата, тогаш нешто правите погрешно. Можеби некоја од овие 6 причини е таа поради која одите на интервјуа, но не добивате понуди за работа: 1. Не сте се подготвиле доволно добро Кандидатите кои вложуваат напор и труд во подготовката за интервју, не само што се подобри во одговарање на прашања, туку и покажуваат самодоверба и искуство. A, oна по што најдобро може да се покаже кандидатот е самодоверба, знаење и професионализам. 2. Немавте добар почеток Првиот впечаток е многу важен, посебно кога се работи за интервју. Немојте да ја правите таа почетничка грешка, додека го чекате тој кој ќе го води интервјуто, да си повторувате во себе одговори кои сте си ги подготвиле од дома – така ќе изгледате нервозно и расеано на првиот состанок. Што ќе кажете и како ќе се однесувате во првите 2 минути, има многу моќно влијание врз проценката на кандидатите. 3. Премногу сте „дрдореле“ Кога кандидатите се нервозни, им се случува да кажуваат премногу информации, но претераното зборување им здосадува на слушачите и им го оттргнува вниманието. Освен тоа, не им оставате време на оние кои го водат интервјуто да покријат сѐ што треба. Обидете се да не си ја дозволувате таа грешка и одговарајте на поставените прашања директно, наместо да лутате со одговорите и да бегате од темата. Најдобро е да го следите „правилото 2 минути“ – никогаш не зборувајте повеќе од 2 минути, без да направите пауза или без да му дадете на соговорникот шанса да зборува во меѓувреме. 4. Не сте пренеле доволно ентузијазам Многу работодавачи се жалат дека кандидатите не покажуваат доволно ентузијазам за улогата. Мора да покажете дека навистина ја сакате таа работа, а не било која друга и да дадете јасни причини зошто е тоа така. Нагласувајте ги важните работи кои сакате да ги кажете и да ги потенцирате и покажувајте кон што имате пасија. Секој ваш одговор треба да ги прикажува вашите способности и вашиот ентузијазам.. 5. Не сте успеале да се справите со проблемите од CV-то Оние кои имаат искуство во водење итнервјуа, се истренирани да ги бараат слабостите во вашето CV. Па, доколку за време на интервјуто не успеете да ги предомислите и да ги убедите во спротивното и да им ги покажете вашите посилни страни – вашата апликација нема да продолжи понатаму. Разгледајте ги сите информации во вашето CV и размислете која од нив би можело да ги загрижи работодавачите и подгответе силни изјави за сѐ. 6. Вашиот краен впечаток бил слаб Не мора да работите во продажба за да знаете колку е важно „да се затвори продажбата“. Што ќе кажете на крајот на интервјуто, ќе биде запамтено многу повеќе отколку целата дискусија. Подгответе неколку позитивни финални прашања и бидете подготвени да го завршите интервјуто како што треба.
Да добиете понуда за работа после толку испратени апликации, е навистина големо достигнување. Но, не сите можности се вредни – понекогаш, подобро е да одбиете некоја понуда и да се фокусирате на следното интервју. Треба веднаш да знаете дека работата не е вредна ако работодавачот ве третирал лошо, или ако добиеното работно место не одговара на она што сте го разговарале на интервјуто. Во секој случај, не секогаш овие работи се очигледни на почетокот, па затоа треба внимателно да размислите за компанијата и за понудата пред да донесете конечна одлука. Дури и оние кои немаат други опции и понуди, не мора да ја прифаќаат единствената понуда по секоја цена. Со малку повеќе труд, ќе ја најдете најдобрата работа за вас. За оние барачи на работа кои не знаат дали треба да ја прифатат понудата или да продолжат со барање на следна работа, еве неколку знаци кои ќе покажат дека работата не е вистинската за вас: Културата на компанијата и околината не е тоа што го сакате Повеќето барачи на работа имаат некоја замислена слика во главата за тоа како сакаат да изгледа компанијата во која ќе работат и нејзината култура и работна средина. Идеалната средина за работа, каква и да е, за вас е најдобра, базирано на вашиот карактер и работни навики. Уште кога ќе одите на интервју, треба веднаш да забележите и да ја почувствувате целокупната атмосфера во компанијата и да знаете дали се совпаѓа со вашите очекувања. Најдобро е да дојдете малку порано од договореното (но, не прерано), за да можете додека чекате да видите како вработените се однесуваат меѓусебно и каков е нивниот начин на работа и интеракција. Не ви се јасни деталите од описот за работа Добар оглас за работа треба да ги содржи основите за позицијата и вие уште пред да отидете на интервју да знаете што точно се работи и се бара, а потоа само подетално да се објаснат улогите. Ако ја добиете работата, но сѐ уште не ви е јаасно што точно се бара од вас на работното место, можеби е најдобро да ја одбиете понудата. Работата не е доволно предизвикувачка Кога знаете што точно бара работата од вас и која е вашата улога, врз база на вашето претходно искуство, може да сфатите дека таа работа нема да го извлече максимумот од вас и нема да работите давајќи сѐ од себе и вашиот потенцијал нема да биде искористен. Секој треба да прифаќа работни места каде што со добиената улога ќе може да се истакне и да се чувствува успешно, ќе може да учи нови вештини, да шири повеќе познанства и да си поставува цело кои ќе му биде предизвик да ги достигнува. Доколку тоа не е возможно со работата која ви е понудена, треба да ја одбиете. Често менување на вработени Важно е да дознаете зошто позицијата која ви ја нудат е слободна. Доколку заменувате некој друг вработен – дали тој вработен бил отпуштен или дал отказ? Колку долго бил во компанијата? Честите промени на вработените може да означуваат многу работи, меѓу кои и неефективен процес на вработување и незадоволство кај вработените. Доколку можете, дознајте како вработените зборуваат за своите колеги и со какви проблеми се соочуваат во организацијата. Одговорот на овие прашања ќе ви го покаже нивото на софистицираност на компанијата и на вработените и ќе знаете дали сакате да бидете дел од таа организација. Едноставно не сте возбудени за работата Можеби звучи клише, но треба да го слушате својот инстинкт кога се работи за нова можност за вработување. Работата најверојатно  не е добра за вас, ако не сте возбудени за можноста која ви е понудена да се приклучите на тим во одредена организација. Не е секогаш подобро на другата страна – ако не сте добиле желба за време на интервјуто или ако не сте се пронашле во тимот и не сте сигурни дека сакате да работите со нив, тогаш ова нема да се промени ниту кога ќе станете дел од нив.
Да се одбере вистинската кариера во вистинската област е навистина тешко, дури и со помош од поискусни, може да бидете несигурни во тоа што е најдобро за вас. Една од причините за тоа е што луѓето почесто се фокусираат на парите, отколку на самата работа и тоа што тие сакаат. Многу луѓе може да прифатат работа што не ја сакаат, само затоа што е добро платена. Без разлика дали сте на почетокот на кариерата или сте со искуство, но мислите дека треба да ја проемните вашата кариера, следете ги овие чекори, кои ќе ви помогнат да го одберете најдобриот пат: 1. Одредете дали навистина сте избрале погрешна кариера Доколку размислувате за промена на кариерата, најверојатно, веќе некое време сте се мачеле со овој проблем во главата. Прво што треба да направите е да одредите дали сте во погрешна област или во погрешна околина. Ако сте одбрале погрешна работа, земете си време да сфатите зошто е погрешна. Што ве прави несреќни? Најдете го тоа што го барате пред да премиенте на следна работа. Можеби ќе треба да копате подлабоко за да сфатите што навистина ви пречи во работата. Ако се чувствувате уморно, нервозно, досадно, под стрес на сегашната работа и секојдневно се борите и мачите со дневните задачи кои ги имате, можеби е неопходна промена на кариерата и индустријата во која работите. 2. Дознајте што сакате, а што не сакате Луѓето завршуваат во погрешни индустрии и кариерите им одат во погрешна насока поради многу различни причини. Многу често се случува тие да одберат и да прифатат работа за да задоволат некој член од семејството или за да постигнат некој статус, да добијат одредена плата или едноставно, затоа што во тој момент изгледало како одбра идеја. Треба да знаете дека тоа во што сте добри, треба да го претворите во ваша кариера. Но, проблемот е што сте добри во повеќе работи и сте страстни кон повеќе работи. А, најдобро е да се пронајдете таму каде што работите во кои сте добри и за кои сте страстни се сретнуваат и се поклопуваат. Кога се одлучувате за нов правец во кариерата, најдобро е да имате конкретни цели, а тие цели ќе ги откриете поставувајќи си ги следниве прашања: Што уживате да правите? Кои вештини ги употребувате кога го правите тоа во што уживате? Што ви значи најмногу? Во што сте добри? За што ви се восхитуваат другите и зошто? Кои работи ги правите подобро од останатите? Откако ќе ги одговорите овие прашања, ќе ви биде полесно да одредите каде сакате да бидете и што ви треба за да стигнете дотаму. 3. Проценете ја вашата позадина и карактер Кога ќе знаете што сакате од вашата кариера, оценете ги вашите квалификации кои ги поседувате за работните позиции во таа област. Два најважни фактора при избирање идеален кариерен пат, се вашата позадина (образование, претходно искуство, практични вештини) и вашиот карактер (карактерни црти, интереси, вредности) Двете треба да бидат земени во обѕир, но во зависност од вашата посакувана кариера, некогаш вашиот карактер може да биде поважен од вашето резиме. Сепак, ако одберете кариера во областа на инженерството, медицината или правото, тренингот и вештините се многу важни. Но, во некои други улоги, како на пример во менаџментот, карактерните особини, како посветеност кон работното место и кон вработените, силната работна етика и лојалноста, се многу поважни. Можете да научите и да се стекнете со нови вештини секогаш, но не можете во секој период од животот одново да се научите на правилно однесување, став, култура и етика. Поседувањето на диплома во одредени индустрии може многу да ви помогне, но ако ја немате, не мора да значи дека тоа ќе ве спречи да добиете некоја работа. Личност со вистински способности и желба за учење, може да биде добар избор за позицијата во некоја компанија, дури и ако нема формално и стручно образование за тоа поле. Најважно од сѐ е да знаете дека треба да пробате повеќе различни работи пред да се одлучите за вашиот кариерен пат. 4. Бидете отворени за секакви можности Без разлика до која фаза од животот или од кариерата сте стигнале, најважно е дека при бирањето работа, треба да ги имате на ум сите опции. Ако сте нови на пазарот на труд, земете си време да  ги истражите вашите интереси и да учите за различните кариерни патишта. Верувајте му на сопствениот инстинкт и запамтете дека пробните периоди и грешките се дел од процесот на бирање кариера. Истото важи и за оние кои ја менуваат кариерата – никогаш не е предоцна да ги достигнете вашите професионални цели, дури и ако сте биле на погрешна патека досега, сѐ уште можете да ја смените работата за некоја друга која што мислите дека ќе ве направи посреќни.
Без разлика дали барате работа првпат, или сте вработени, но барате нова работа - да се одбере најдобрата понуда, може да биде вистински предизвик. Тешко е да се одлучи која компанија е најдобриот избор, посебно со сите различни фактори и карактеристики кои ги има во секоја понуда. Од плата и бенефиции, до култура на компанијата и можности за кариерен развој – има многу за размислување. Доколку се двоумите помеѓу две или повеќе понуди, еве неколку совети кои ќе ви помогнат полесно да направите избор и да се одлучите: 1. Одредете ги вашите приоритети Што ви е најважно? Локацијата? Работните обврски? Животниот стил? Важно е да размислите кои се вашите приоритети и како сите од понудените работни места ќе се поклопат со нив? Ценете ги вашите приоритети и според нив оценувајте ги понудите за работа. Најдобро е да започнете со листа на која ќе имате запишано сѐ што сакате од вашата нова работа, па кога ќе ги добиете понудите, веднаш ќе можете да ги споредите со вашите листи и да видите која највеќе одговара на вашите критеруми. Кога ќе добиете понуда, треба да одлучите дали е само за парите или е повеќе од тоа. Не треба да ја судите работата само според платата, а ова е најчестата грешка која ја прават барачите на работа. 2. Земете ја во предвид потенцијалната работна околина Културата на компанијата и типот на луѓето со кои ќе работите, ќе ви влијае на вашето секојдневно и долгорочно задоволство од работата. А, тоа колку ќе бидете среќни е исто така важен фактор за кој треба да се размисли. Земете ја предвид околината и културата на организацијата, дали е тоа место каде можете да напредувате и дали мислите дека можете да се вклопите добро? Доколку не сте среќни во самата околина и организација, тогаш платата нема да биде толку важна, бидејќи нема да бидете доволно мотивирани за да дадете сѐ од себе и да бидете најдобри во работата. И најважно од сѐ – дали имате иднина во оваа компанија? Фокусирајте се на иднината и посветете се на овие неколку работи: Каков кариерен пат можете да очекувате со прифаќање на работата овде? Дали на компанијата и е приоритет кариерниот развој на вработените? Дали ќе имате можности да ги надоградите вашите вештини? Можете да дознаете многу за тоа како компанијата работи и ги третирата своите вработени, само од интервјуто. Искористете ја вашата интуиција и немојте да избрзувате со одлуката. Доколку има нешто што не ви е јасно и за што не сте сигурни, слободно поставете прашања и видете како ќе ви одговорат. 3. Ставете се на прво место Ако компанијата ви прави притисок да ја прифатите понудата, објаснете им дека ви треба уште малку време и кажете им ја причината. Доколку тие навистина ги ценат кандидатите кои се добри за таа позиција, наместо да сакаат да го пополнат местото со било кој што ќе го најдат, тогаш ќе ви дадат време да донесете правилна одлука. Но, ако ако не го направат тоа, тогаш имате одговор на прашањето како тие ги третираат кандидатите и колку го ценат вистинскиот квалитет.
Луѓето бараат нова работа од многу различни причини, па дури и кога веќе имаат постојана работа. Помислата за потрага по нова работа, може да биде возбудлива и да избрзате со постапките, но треба паметно да пристапувате кон тоа, бидејќи сѐ уште имате одговорност кон сегашниот работодавач. Па, доколку се обидувате да најдете нова работа, додека сѐ уште работите на друго место, погледнете ги овие совети кои ќе ви помогнат да направите баланс помеѓу вложувањето напор во пребарувањата и избегнување на проблеми со шефот. 1. Не пребарувајте во текот на работното време На прво место се обврските кои ги имате на вашето моментално работно место, па затоа е важно времето посветено на пребарување нови работни места, да биде надвор од работните часови. Најдобро е да посветите време кое ќе биде посебно наменето за пребарување отворени работни позиции, со цел да биде тоа поефективно и да бидете пофокусирани на тоа. 2. Задржете го тоа за себе Вашето пребарување е ваша лична одлука и дури и ако им верувате на колегите, сепак не можете да контролирате што тие споделуваат со останатите. Најдобро е да не ги кажувате вашите планови, барем додека не се осигурате дека ќе бидете поддржани во тоа, бидејќи не знаете дали тие ќе стигнат до погрешни луѓе предвреме. 3. Бидете внимателни додека сте онлајн Внимавајте како се однесувате, какви трагови оставате и дали некој ве гледа кога посетувате сајтови за огласи или кога ги користите социјалните медиуми за проширено пребарување и секако немојте да го објавувате јавно вашето CV онлајн. Дури и најмалата ситница може да ве издаде и вашиот работодавач да забележи што се случува зад неговиот грб. 4. Закажувајте состаноци паметно Повеќето работодавачи кои вработуваат, имаат разбирање кога кандидатите имаат потреба да се состануваат за интервју надвор од работните часови. Затоа, нека не ви биде непријатно да ги закажувате интервјуата пред или после работа, а ако времето ви дозволува, може и за време на пауза. Ако на потенцијалниот работодавач му кажете дека преферирате интервјуто да го закажете во некои од горенаведените периоди, бидејќи сте зафатени на работа или сте му потребни на вашиот тим, индиректно изјавувате дека имате интегритет и му давате до знаење дека сте кандидат кој навистина вреди и ја цени работата. 5. Продолжете да работите напорно Додека да најдете нова работа, важно е на сегашното работно место да продолжите да го давате најдоброто од себе и да одржите силни врски со вашите сегашни колеги и со работодавачот, пред сѐ за да им покажете дека ги цените и почитувате. Со тоа загарантирано ќе имате добра препорака доколку ви е потребна за понатаму. Најважно од сѐ е да запамтите дека не правите ништо лошо со тоа што барате нова работа, бидејќи колку и да сте лојални, доколку не ви одговара повеќе таа работа, ваше право е да најдете подобри можности за вас.
Како „тазе“ дипломирани, лесно е да помислите дека сите тие години поминати во предавања, учење, читални и предавални е веќе минато – но, не брзајте! Иако сте завршиле со школување, сепак е важно да продолжите да учите. Учеството на важни конференции, семинари, предавања, не само што ќе ве држи во игра, туку и ќе ви помогне да ги проширите вашите хоризонти, да остварите нови контакти и да гледаат на вас како на експерт во вашата област. Како учествувањето на работилници, обуки, конференции и други професионални настани може да ви биде од помош? 1. Ќе продолжите да учите Очигледно, главната причина за учество на настани за професионално учење и развој е да го зголемите вашето знаење за областа во која ќе ја градите вашата кариера. Без разлика дали присуствувате на локални професионални настани или на големи конференции, или курсеви и обуки за карактеристични теми, можете да научите сѐ за вашата индустрија, да се стекнете со многу вештини и да бидете најдобри во работата. Одлучете што би било најдобро за вашата работа и не чекајте. 2. Ќе добивате нови идеи и фидбек за истите Друга добра работа од настаните за професионално учење е што можете да споделите со другите што работите, или што сакате и какви идеи имате за во иднина и да добиете фидбек од оние кои се поискусни во вашето поле. Освен што ќе добиете професионално мислење од останатите, може и да слушнете други идеи кои ќе ви бидат од помош. Исто така, може да искористите да ги прашате оние кои се поискусни сѐ што ве интересира и да разменувате мислења без да ви биде непријатно. 3. Ќе ширите познанства и ќе се поврзете со луѓе Поврзувањето со луѓе е значајна предност на овие професионални настани, бидејќи како скоро дипломирани, врските кои ќе ги остварите на конференции и семинари ќе бидат голем бенефит за вашата кариера понатаму. Присуството на овие настани е одличен начин да демонстрирате дека сте посветени на вашата кариера и областа во која ќе ја градите истата. Затоа немојте да чекате, бидејќи покрај сите овие предности кажани досега, овие настани може исто така да бидат начин да го добиете вашето следно работно место.
Работата во странство е голем чекор, но е интересно искуство, гледано од професионален и личен аспект. Тоа секако не е за секого, бидејќи не сите се подготвени на таков чекор, но тешката економска ситуација сѐ почесто ги тера луѓето да бараат можности за работа во странство. Добра страна е тоа што ќе ви ја зајакне кариерата и ќе ви овозможи понатаму подобри работни места, со оглед на тоа што во вашето CV ќе стои дека имате искуство од странство. А, еве уште 5 причини кои може да ве поттикнат да согледате дека работата во странство е добра за вашата кариера и личниот развој: 1. Ќе станете поприлагодливи Во секоја земја има различни вредности, манири, култура и однесување на работно место. Кога ќе почнете да работите во друга земја, ќе морате брзо да се приспособите на сите тие разлики. Иако драстичната промена може да ве фрустрира, сепак ќе ве научи да станете пофлексибилни, поотворени, разумно да пристапувате на работите и на другите луѓе. Тоа ќе ви ги подобри професионалните односи со колегите и ќе ви се развијат комуникациските способности. 2. Ќе се прошират вашите хоризонти Без сомнеж, патувањата ги шират вашите хоризонти. Соочувањето со нови култури, јазици, обичаи, или традиционална кујна, ве збогатува на личен и професионален план. Ќе сретнувате луѓе кои ги немаат истите вредности како вас, а сепак ќе се спријателувате со истите и така се менувате и растете како личност. 3. Ќе ве поттикне да преземете ризици Секоја работа во странство си носи некој ризик, кој треба да го преземете со прифаќањето на работата. Ризикот е застрашувачки, неочекуван и непредвидлив. Но, тој ви дава можност да ги истражите вашите таленти, интереси, способности и соништа. Ќе научите како да поставувате јасни цели и како да ги остварите. Ќе научите да се справувате со различни проблеми и препреки на кои ќе наидете. И најважно од сѐ, е дека тоа ќе ви овозможи да ги победите сопствените стравови кои најчесто се кочница за успех и кариера од соништата. 4. Ќе развиете нови вештини Работата во странство ќе ве натера да гледате на работите од различна перспектива. Вашиот нов работодавач ќе ви пренесе знаење и вештини кои ќе ве направат поефективни на работното место. Така, ќе добиете подобар увид во работната околина, па со цел да се вклопите во истата, па дури и да ги надминете останатите, ќе се борите и ќе станете покреативни, поактивни, поефикасни и ефективни. 5. Ќе ви овозможи да ги посетите земјите кои секогаш сте сакале да ги видите Многу се ретки оние кои ќе кажат дека не сакаат да патуваат. Повеќето мечтаат за егзотични земји со различни култури и обичаи. Не мора и да се толку далечни или различни, но сепак, секоја земја има своја уникатност, која за нас би била промена. Работата во странство можеби е токму таа авантура која никогаш не сте ја доживеале, а од секогаш сте ја посакувале. Понекогаш треба многу храброст за да се впуштите во нешто непознато и да ја зграбите шансата. Без разлика какво искуство ќе доживеете, лекцијата која ќе ја научите ќе ве направи попаметни, похрабри и поспособни.
Многу често прашање кое им го поставуваат на кандидатите на интервју за работа е „Зошто треба да ве вработиме вас?“. Колку и да звучи чудно и тешко ова прашање, сепак е добра можност да се сумира сѐ и кандидатите да објаснат зошто тие мислат дека се добар избор за позицијата. Можете да зборувате за вашите вештини, за тоа како се вклопувате во културата и сѐ останато што мислите дека може да ви биде од корист. Во иднина, кога ќе ви го постават ова прашање, водете се по следниве 3 стратегии и бидете подготвени однапред за одговорот. 1. Вкрстување Еден начин да одговорите на ова прашање е да кажете каде вашите интереси се вкрстуваат, односно - да кажете што ќе добиете вие со тоа што ќе ве вработат, а што работодавачот. На пример, добрата страна за нив е тоа што ќе добијат ентузијастичен вработен, кои ги има потребните вештини за позицијата, а вие ќе имате можност и ќе бидете мотивирани да направите нешто корисно, да ги надоградувате вашите вештини и искуства и ќе успеете да бидете на чекор поблиску до успешна кариера. Најважно од сѐ е да не го заборавите вториот дел каде што зборувате за вас и вашите предности од работата. Многу луѓе зборуваат само за тоа каков бенефит ќе има работодавачот од нив, но доколку објасните зошто оваа работа е добра за вас, ќе им дадете до знаење дека има нешто што ќе ве одржува мотивирани - а тоа го сака секој работодавач. 2. Експерт Некои од спроведувачите на интервјуата го кажуваат отворено, некои други не, но треба да знаете дека целосното прашање е: „Зошто треба да ве вработиме вас, а не некој друг?“. Ако веќе неколку пати за време на интервјуто сте ги напоменале вашите вештини и искуства, можеби подобар пристап е да покажете што вие имате, а другите немаат. Со оглед на тоа што се натпреварувате со кандидати со слични квалификации, во овој момент најдобро е да ја истакнете вашата посветеност на улогата која ќе ја имате во компанијата. За да го направите тоа, покажете длабоко знаење за бизнисот и за тоа како вие се вклопувате во истиот. Ова, секако бара добро истражување на компанијата, за да може да зборувате за уникатноста, историјата, иднината и вашиот личен влог во целата таа приказна. Со покажувањето на вашето големо познавање, презентирате неколку намери: покажувате дека сте заинтересирани за позицијата, се истакнувате како кандидат кој може полесно да се обучи за разлика од другите кандидати и демонстрирате како се справувате со нешто во кое сте целосно вложени. 3. Решавач на проблем Понекогаш, работодавачите отвараат работни позиции, бидејќи имаат некој проблем кој треба да се реши и за таа цел им треба некој на тоа место. Преминете веднаш на главното, бидете директни во одговорот и објаснете детално како можете да понудите идеално решение за компанијата во тој момент. Немојте да го трошите целото време зборувајќи за вашите минати искуства, туку фокусирајте се на тоа што планирате, што можете да направите во иднина и како можете да ја олесните работата на компанијата, менаџерите и останатите вработени. Со ова ќе покажете дека размислувате однапред за понатаму, дека сте тимски играч и дека сте подготвени да започнете со полна енергија.